काठमाडौं रेजर्सले पहिलो संस्करणको नेपाल सुपर लिग (एनएसएल) फुटबलमा दोस्रो जित निकालेको छ । मंगलबार भएको खेलमा बुटवल लुम्बिनी एफसीलाई १–० गोल अन्तरले पराजित गर्दै काठमाडौंले दोस्रो जित निकालेको हो ।

त्रिपुरेश्वरस्थित दशरथ रंगशालामा काठमाडौंलाई जित दिलाउन स्टेफेन बिलोङले निर्णायक गोल गरे । आक्रामक खेल पस्किएको काठमाडौंले बुटवलमाथि सुरुवातबाटै दबाबमा राखेको थियो । खेलको पाँचौं मिनेटमा स्टेफेन बिलोङले गोल गर्दै काठमाडौंलाई १–० को अग्रता दिलाए । सुदिल राईको लामो पासमा गोलरक्षक विशाल श्रेष्ठ आउन ढिलो गरेपछि स्टेफेनले सहजै गोल गरेका थिए ।

खेलको छैटौं मिनेटमा बुटवलले पेनाल्टीबाट बराबरी गर्ने मौका पायो । काठमाडौंका विश्वास श्रेष्ठले सुमन लामालाईलडाएपछि बुटवलले पेनाल्टी पाएको थियो । तर, पेनाल्टीमा बुटवलका विलियम ओपोकु गोल गर्न चुके । उनको प्रहार काठमाडौंका गोलकिपर विकेश कुथुले उत्कृष्ट बचाऊ गरे ।

यो जितपछि काठमाडौं रेजर्सले चार खेलमा सात अंक बनाउँदै शिर्ष तीनमा पुगेको छ । साथै शिर्ष दुईमा रहेका विराटनगर र धनगढीसँग अंक बराबरी गरेको छ । जारी प्रतियोगितामा बुटवल लुम्बिनीको यो पहिलो हार हो भने काठमाडौंको दोस्रो जित हो ।

 

LEAVE A REPLY

Please enter your comment!
Please enter your name here