मधेस प्रदेश सभामा समानुपातिक तर्फको ४३ सिटका लागि भएको निर्वाचनमा अहिलेसम्म प्रमुख दलहरु नेपाली कांग्रेस, नेकपा एमालेसहित १० दलले भागबण्डा पाउने भएका छन्। मंसिर ४ गते सम्पन्न निर्वाचनको जारी मतगणनामा बिहिबार अपरान्ह २ बजेसम्म भएको २० लाख ७५ हजार २ सय २४ मत गणना हुँदा पहिलो पटक निर्वाचनमा भाग लिएर पनि आश्चर्यजनक ढंगले प्रदेश र संघतर्फ केही प्रत्यक्ष सिटसहित थ्रेसहोल्ड कटाउन सफल सिके राउतको जनमत पार्टीले समेत समानुपातिकतर्फ हिस्सा पाएको छ। अहिलेसम्मको मतगणना परिणामका आधारमा दलहरुले प्राप्त गरेको मतलाई निर्वाचन ऐन र निर्देशिकामा उल्लेखित विजोर भाजकले भाग गर्दा सबैभन्दा धेरै सिट कांग्रेसले ९ स्थान सुरक्षित गरेको छ। प्रत्यक्ष तर्फको ६४ सिटका लागि भएको निर्वाचनमा सबैभन्दा बढी १५ सिटमा जित निकालेको नेकपा एमालेले समानुपातिक तर्फ भने कांग्रेसको भन्दा जम्मा १ सिट कम अर्थात ८ स्थान पाउने सम्भावना देखिन्छ। कांग्रेसले प्रत्यक्ष तर्फ भने जम्मा १३ सिट जितेको थियो। यसैगरी प्रत्यक्षतर्फ ६ सिट जितेको जनमत पार्टीले समानुपातिक तर्फ ७ सिट जितेको छ भने प्रत्यक्षमा ९ सिट जितेको जनता समाजवादी पार्टी नेपालले पनि मधेस प्रदेश सभाको समानुपातिक तर्फ ७ सिट नै जित्ने सम्भावना छ। यदी अहिलेको मत गणनाको अनुपातमा तात्विक फेरबदल भएन भने प्रत्यक्ष तर्फ ४÷४ सिट जितेका नेकपा माओवादी केन्द्र र नेकपा एकीकृत समाजवादीले क्रमशः ४ र ३ सिट समानुपातिक तर्फ जित्ने छन्। प्रत्येक्षतर्फ ७ सिट जित निकालेको लोकतान्त्रिक समाजवादीले भने समानुपातिक तर्फ जम्मा २ सिटमा चित्त बुझाउनु पर्ने अवस्था देखिएको छ भने १.५ थ्रेसहोल्ड कटाउन सफल राष्ट्रिय प्रजातन्त्र पार्टी, नागरिक उन्मुक्ति पार्टी र नेपाल संघीय समाजवादी पार्टीले क्रमशः १÷१ स्थानमा आफ्नो सिट सुरक्षित गरेका छन्।