सोमबार एकैदिन नेपालमा दुई सय २६ जनामा कोरोना संक्रमण पुष्टि भएको छ । देशका बिभिन्न स्थानमा रहेको प्रयोगशालामा गरिएको जाँचमा २२६ जना नयाँ कोरोना संक्रमित फेला परेको स्वास्थ्य मन्त्रालयका प्रवक्ता डा. विकास देवकोटाले जानकारी दिए । संक्रमितमा २१३ जना पुरुष र १३ जना महिला रहेका छन् । नयाँ संक्रमित थपिएसँगै संक्रमितको संख्या १ हजार ७ सय ९८ पुगेको छ । जसमध्ये २ सय २१ जना उपचारपछि डिस्जार्च भएका छन् । नेपालमा कोरोना संक्रमणका कारण ८ जनाको भने मृत्यु भइसकेको छ । सोमबार डोटीमा पनि संक्रमित थपिएसँगै संक्रमित जिल्लाको संख्या ५९ पुगेको प्रवक्ता देवकोटाले जानकारी दिए । कोरोनाको आशंकामा गएको २४ घण्टामा २ हजार ३ सय १० जनाको पिसिआरबाट नमूना परीक्षण भएको छ । नेपालमा हालसम्म १ लाख ८५ हजार ६ सय ६० जनाको कोरोना परीक्षण भएको स्वास्थ्य तथा जनसंख्या मन्त्रालयले जनाएको छ । ७१ हजार ९ सय ३ जनाको पिसिआर र १ लाख १३ हजार ७ सय ५७ जनाको आरडिटिबाट परीक्षण भएको मन्त्रालयका विकास देवकोटाले बताए । संक्रमितको विवरण: दैलेखका ४१ कपिलवस्तुका ४० सर्लाहीका ३८ जुम्लाका १९ रौटहतका १८ कैलालीका १४ सल्यानका १० दाङका ९ बाँकेका ७ धनुषाका ७ सुर्खेतका ५ सिरहाका ५ नवलपरासी पूर्वका ३ झापाका २ महोत्तरीका २ मकवानपुरका १ उदयपुरका १ अछामका १ बैतडीका १ डोटीका १ कञ्चनपुरका १