नेपालमा मंगलबार थप २७ जना कोरोना संक्रमित भेटिएका छन् । स्वास्थ्य तथा जनसंख्या मन्त्रालयका प्रवक्ता डा. विकास देवकोटाले नियमित ‘प्रेस ब्रिफिङ’मा मंगलबार २७ जना संक्रमित फेला परेको र संक्रमितको संख्या ४०२ पुगेको जानकारी दिए । थपिएकाहरु १७ देखि ४२ वर्षका रहेका छन् । जसमा तीनजना महिला हुन् । मंगलबार थपिएका झापाका नौ, कपिलवस्तुका चार, काठमाडौंका तीन, सर्लाहीका दुई, ललितपुरका एक, भक्तपुरका एक, सिन्धुलीका एक, लमजुङका एक, मकवानपुरका एक, रामेछापका एक, नवलपरासीका एक, सुनसरीका एक र मोरङका एकजना रहेका छन् । ३६ जिल्लामा फैलिइसकेको कोरोनाको संक्रमणबाट सबैभन्दा बढी प्रदेश नम्बर–५ मा १७६, प्रदेश नम्बर–२ मा १३६, प्रदेश नम्बर–१ मा ५४, वाग्मती प्रदेशमा २७, गण्डकी प्रदेशमा चार, सुदूरपश्चिम प्रदेशमा पाँच तथा कर्णाली प्रदेशमा एकजना संक्रमित भएको प्रवक्ता देवकोटाले जानकारी दिए। विराटनगरस्थित कोशी अस्पतालबाट मंगलबार झापाका एकजना ‘डिस्चार्ज’ भएका छन् । हालसम्म ३७ जना डिस्चार्ज भएका छन् । हाल देशभर २१ हजार ६२३ जना ‘क्वारेन्टाइन’मा रहेका छन् । ४५७ जना ‘आइसोलेसन’मा रहेका छन् । काठमाडौं उपत्यकाभित्र १७ जना आइसोलेसनमा रहेको पनि स्वास्थ्य मन्त्रालयले जनाएको छ ।