नेपाली कांग्रेसका सभापति शेरबहादर देउवाले निर्धारित समयमा नै पार्टीको १५औँ महाधिवेशन हुने जानकारी दिएका छन्।
बिहिबार चितवनको भरतपुर बिमानस्थलमा सञ्चारकर्मीसंग कुरा गर्दै सभापति देउवाले निर्धारित समयमा नै महाधिवेशन हुने बताएका हुन्।
पार्टी विधान अनुसार, सामान्य स्थितिमा प्रत्येक चार वर्षमा पार्टीका सबै तहको अधिवेशन हुनु पर्ने प्रावधान रहेको छ भने, विशेष कारणबस अधिवेशन हुन नसकेको अवस्थामा थप एक वर्षको अवधि विधानले नै लम्बयाउन सक्ने व्यवस्था गरिदिएको छ। यसका अतिरिक्त उक्त अवधिमा पनि कुनै विशेष कारणले अधिवेशन हुन सकेन भने संविधानले थप ६ महिना गरी साढे पाँच वर्षको कार्यकालभित्र अधिवेशन गराउनु पर्दछ।
यस अधारमा पार्टीकै अल्पमत पक्षका कतिपय नेताहरुले विधानको सामान्य अवस्थामा नियमित अधिवेशन चार वर्षभित्रै गरिसक्न पर्ने झिनो आवाज उठाउँदै आएपनि पार्टीको आन्तरिक तयारी र विधानको कतिपय विषयहरुका कारण वर्तमान कार्यसमितिको कार्यकाल कम्तिमा पनि पाँच वर्षसम्म पुग्नेमा खासै आशंका छैन।
यसरी सभापति देउवाले समयमै अधिवेशन भइहाल्छ भनेपनि तयो समय सीमाको निर्धारण के र कसरी हुन्छ भन्नेबारे केही उल्लेख गरेका छैनन्।
यसैगरी सभापति देउवाले भिजिट भिसा प्रकरणमा गृहमन्त्रीबिरुद्ध झुटा आरोप लगाउने प्रयास भएको प्रतिक्रिया दिए।
उनले कांग्रेस र एमाले फरक फरक दल भएकाले कतिपय निर्णयमा एकमत नहुनु सामान्य कुरा भएको बताउँदै बजेटमा व्यवस्था गरिएको टेक एण्ड पे को व्यवस्थाबारे पनि केही असहमति हुँदाहुँदै पनि एमाले अध्यक्ष एवं प्रधानमन्त्री केपी शर्मा ओलीसँग कुराकानी गरेलगत्तै त्यसमा संशोधन भइसकेकोले यसलाई सामान्य रुपमा लिनु पर्ने बताए।
कांग्रेसकी नेतृ तथा प्रजातन्त्र सेनानी गौरीदेवी प्रधानको श्रद्धाञ्जली सभामा सहभागी हुन सभापति देउवा लगाएतका नेता चितवन पुगेका हुन्।
चितवनको नारायणगढमा प्रजातन्त्रिक आन्दोलनकी योद्दा गौरीदेवी प्रधानको शोक सभामा सहभागी भएका देउवाले उक्त सभामा बोल्दै मुलुकको निर्वाचन प्रणालीका कारण कुनै पनि पार्टीको एकल बहुमत आउन गाह्रो रहेको भन्दै पार्टी एकढिक्का भए आगामी निर्वाचनमा बहुमत आउन सक्ने दाबी गरे।
कुनै पनि पार्टीको एकल बहुमत नआएकै कारण अन्य दलसंग मिल्नुपर्ने बाध्यता रहेको उल्लेख गर्दै सभापति देउवाले अहिलेको संविधान समाबेशी समानुपातिक रहेकाले यसलाई थप बलियो बनाउनुपर्ने धारणा राखे।
उनले प्रजातन्त्रिक आन्दोलनकी योद्दा गौरीदेवी प्रधान देखाएको बाटोमा पार्टीलाई अघि बढाउने प्रतिवद्धता जनाएका थिए।
नेपाली कांग्रेस चितवनले आयोजना गरेको शोकसभामा काग्रेसका पुर्व उपसभापति बिमलेन्द्र निधिले नेपालमा प्रजातन्त्र पुनर्बहालीको लागि भएको आन्दोलनमा गौरीदेवी प्रधानले गर्नुभएको योगदानको स्मरण गरेका थिए।
