चुनाव प्रणालीको सुरुवात भएयता कहिल्यै नजितेको धरान उपमहानगरपालिकाको प्रमुख पदमा नेपाली कांग्रेसका उम्मेदवारले राम्रो नतिजा ल्याउने दिशातर्फ उन्मुख भएका छन्। शनिबार सम्पन्न उपनिर्वाचनको पछिल्लो मतगणना परिणाम अनुसार, कांग्रेसका तिलक राईले ६ हजार ७ सय ५७ मत ल्याएर अग्रता लिएका छन्। उनलाई नेकपाका प्रकाश राईले ६ हजार ४ सय २३ मत ल्याउर पछ्याइरहेका छन्। कम्युनिष्टहरुको गढका रुपमा परिचित उक्त उपमहानगरपालिकामा तिलक राईले अनपेक्षित रुपमा सुधार गर्दै ३ सय ३४ मत अन्तरले अग्रता लिन सफल भएका छन्। यसअघि उनी नेकपाका उम्मेदवारलाई कहिले १७ त कहिले ५७ मत अन्तरले पछ्याइरहेका थिए।