सीजी मोटर्स कम्पनीले आजदेखि नेपालको पर्यटकीय शहर पोखरामा विद्युतीय सवारी साधनको सप्ताहव्यापी ‘महा मेला एक्सचेन्ज कार्निभल’को आयोजना गरेको छ।
नेपालको प्रतिष्ठित व्यापारिक समूह चौधरी ग्रुप अन्तरगतको सीजी मोटर्स कम्पनीले नेपालमा विद्युतीय सवारीसाधनको पहुँचलाई थप विस्तार गर्ने उद्देश्यले पोखराको अमरसिंह मैदानमा महामेलाको आयोजना सुरु गरेको हो।
सीजी मोटर्सले दिएको जानकारी अनुसार, उक्त महामेला एक्सचेन्ज कार्निभल असार १० देखि १५ गतेसम्म (बिहान ९ बजेदेखि साँझ ६ बजेसम्म) अर्थात ६ दिनसम्म सञ्चालन हुने छ।
नेपालमा अग्रणी विद्युतीय मोबिलिटी ब्रान्डहरूको आधिकारिक वितरकका रूपमा स्थापित सीजी मोटर्सले आयोजना गरेको यस कार्निभलमा ग्राहकहरूले एकै स्थानमा विभिन्न प्रिमियम ईभी ब्रान्ड तथा अत्याधुनिक प्रविधियुक्त सवारीसाधनहरू अवलोकन गर्न पाउनेछन्।
कार्यक्रममा जीएसी आयन, रिडारा तथा दायुनका लोकप्रिय विद्युतीय मोडलहरू प्रदर्शनीमा राखिनेछन्।
व्यक्तिगत तथा व्यावसायिक प्रयोगका लागि उपयुक्त विद्युतीय सवारीसाधनहरूलाई केन्द्रमा राखेर आयोजना गरिएको यस मेलामा सहभागी ब्रान्डहरूमा विशेष नगद छुट, आकर्षक एक्सचेन्ज सुविधा, सवारी मूल्यांकनमा विशेष लाभ, सहज फाइनान्सिङ सहयोग तथा कार्यक्रम अवधिभर लागू हुने विशेष स्वामित्व प्याकेजहरू उपलब्ध गराइने सीजी मोटर्सले जनाएको छ।
विद्युतीय सवारीसाधन खरिद गर्ने योजना बनाएका ग्राहक, अटोमोबाइलप्रेमी, व्यवसायी तथा वातावरणमैत्री यातायाततर्फ आकर्षित व्यक्तिहरूका लागि यो कार्निभल विशेष अवसर हुने अपेक्षा गरिएको छ।
ग्राहकहरूले विभिन्न ईभी ब्रान्डहरूको विशेषता, प्रविधि तथा सुविधाबारे प्रत्यक्ष जानकारी लिनुका साथै टेस्ट ड्राइभको अनुभव समेत प्राप्त गर्न सक्नेछन्।
सीजी मोटर्सका अनुसार, काठमाडौंमा सफलतापूर्वक सम्पन्न भएको ‘महा मेला एक्सचेन्ज कार्निभल’ को उत्साहजनक प्रतिक्रियापछि पोखरामा पनि कार्यक्रम आयोजना गरिएको हो।
यो कार्निभल केवल सवारी प्रदर्शनी मात्र नभई नेपालमा दिगो, प्रविधिमैत्री तथा वातावरणमैत्री यातायातको प्रवर्द्धन गर्ने अभियानको हिस्सा हो।
एउटै प्लेटफर्ममा विभिन्न ईभी ब्रान्ड, आकर्षक खरिद सुविधा तथा एक्सचेन्ज अवसर उपलब्ध गराएर ग्राहकहरूलाई विद्युतीय सवारीसाधनतर्फ आकर्षित गर्ने लक्ष्य कार्यक्रमले राखेको छ।
