शिक्षा, विज्ञान तथा प्रविधिमन्त्री गिरिराजमणि पोखरेलले ग्रेडिङ प्रणालीको नतिजा राम्रो आउन समय लाग्ने बताएका छन्। नेपाल पत्रकार महासंघले मंगलबार आयोजना गरेको शिक्षा पत्रकारिता पुरस्कार २०७५ कार्यक्रममा बोल्दै मन्त्री पोखरेलले यस्तो बताएका हुन् । मन्त्री पोखरेलले ११/१२ को नतिजा राम्रो आउन १० वर्ष लाग्ने दाबी गरे । उनले सामुदायिक विद्यालयको नतिजा माथि देखाउन ग्रेडिङ प्रणाली लागू नगरेको समेत स्पष्ट पारे। उनले शिक्षा जनशक्ति उत्पादन गर्ने क्षेत्र भएका कारण यसमा अझ ठूलो बहस आवश्यक भएको समेत बताए । कार्यक्रममा नेपाल पत्रकार महासंघले यस वर्ष शिक्षा पत्रकारिता पुरस्कार ३६ जनालाई र लैङ्गिक समानता पुरस्कार ३ जनालाई प्रदान गरेको छ । नेपाल पत्रकार महासंघ र शिक्षा मन्त्रालय, शिक्षा तथा मानव स्रोत विकास केन्द्रद्वारा संयुक्तरुपमा प्रदान गरिने ५१ हजार रुपैया राशीको पुरस्कार राष्ट्रिय शिक्षा पत्रकारिता पुरस्कार–२०७५नागरिक दैनिक काठमाडौंमा कार्यरत पत्रकार रुबी रौनियारलाई प्रदान गरेको छ । त्यस्तै महासंघले सात प्रदेश र उपत्यकालाई १ प्रदेश मानी ८ प्रदेशबाट १÷१ जनालाई प्रदान गर्ने २० हजार रुपैया राशीको प्रादेशिक शिक्षा पत्रकारिता पुरस्कार–२०७५ ८ जनालाई प्रदान गरेको छ । महासंघले ७ प्रदेश र उपत्यकालाई १ प्रदेश मानी ८ प्रदेशबाट २÷२ जनालाई प्रदान गर्ने १५ हजार रुपैया राशीको प्रादेशिक शिक्षा पत्रकारिता प्रोत्साहन पुरस्कार १६ जनालाई प्रदान गरेको छ । त्यसैगरी संस्थागतमा एफएमतर्फ २० हजार राशीको शिक्षा पत्रकारिता पुरस्कार विभिन्न ८ ओटा सञ्चारमाध्यमहरुलाई प्रदान गरेको छ । संस्थागततर्फ नै छापाबाट १, अनलाइनबाट १,र टेलिभिजनबाट १ गरी ३ वटा सञ्चारमाध्यमलाई २५ हजार राशीको शिक्षा पत्रकारिता पुरस्कार २०७५ प्रदान गरेको छ । त्यस्तै महासंघ र मदरल्याण्ड नेपालको सहकार्यमा प्रदान गर्दै आएको लैंङ्गिक समानता पत्रकारिता पुरस्कारबाट यस बर्ष तीनजना पत्रकार पुरस्कृत गरेको छ । पुरस्कृत पत्रकारलाई ४० हजार नगद तथा सम्मान–पत्र प्रदान गरिएको छ ।