चीनको चार दिने औपचारिक भ्रमणमा चीन पुगेका प्रधानमन्त्री केपी शर्मा ओलीले जनवादी गणतन्त्र चीनका राष्ट्रपति सी चिनफिङसँग शिष्टाचार भेटवार्ता गरेका छन्।
चीनको साङ्घाई सहयोग सङ्गठन (एससिओ) शिखर सम्मेलनमा भाग लिन नेपाली प्रतिनिधिमण्डलको नेतृत्व गर्दै शनिबार बिहान काठमाडौंबाट चीनको थियानजिन शहर पुगेका प्रधानमन्त्री ओलीले थियानजिनस्थित अतिथि गृहमा चिनिया राष्ट्रपति सीसँग औपचारिक भेटवार्ता गरेका हुन्।
प्रधानमन्त्री ओलीको सचिवालयले दिएको जानकारी अनुसार, उक्त अवसरमा नेपाल चीनका उच्च सरकारी अधिकारीबिच दुई पक्षीय भेटवार्ता भएको छ।
त्यसअघि थियानजिन विनहाइ अन्तर्राष्ट्रिय विमानस्थलमा प्रधानमन्त्री ओलीलाई चीन सरकारका उच्चाधिकारी र चीनका लागि नेपाली राजदूत कृष्णप्रसाद ओली, नेपालका लागि चीनका राजदूत चेन सोङलगायतले स्वागत गरेका थिए।
एससिओ शिखर सम्मेलनमा भाग लिन २३ सदस्यीय नेपाली प्रतिनिधिमण्डलको नेतृत्व गर्दै प्रधानमन्त्री चीन गएका हुन्।
प्रधानमन्त्री ओलीले सेप्टेम्बर ३ मा बेइजिङमा आयोजना हुने ८०औँ वार्षिकोत्सवको स्मृति कार्यक्रममा सहभागिता जनाउने भ्रमणको कार्यतालिकामा उल्लेख छ।
त्यसअघि उनले सेप्टेम्बर १ मा तियान्जिनमा आयोजना हुने शिखर सम्मेलनलाई सम्बोधन गर्ने र सो अवसरमा प्रधानमन्त्री ओलीले शिखर सम्मेलनमा सहभागी केही विश्व नेताहरूसँग समेत भेटवार्ता गर्ने तयारी रहेको छ।
