प्रतिनिधि सभाका सभामुख देवराज घिमिरेले संवादको वातावरण सृजना गरी सदनलाई आफ्नो मूल लयमा फर्काउन सत्ता र प्रतिपक्षी दलका नेता तथा सदस्यहरुसँग अपिल गरेका छन्।
शुक्रबार प्रतिनिधि सभा बैठकको सुरुवातमै सभामुख घिमिरेले भिजिट भिसा प्रकरणमा रास्वपा र राप्रपाले गरिरहको असन्तुष्टिका बारेमा सहमति खोज्न आफु प्रयत्नशील रहेको भन्दै संवादको वातावरण सृजना गरी सदनलाई आफ्नो मूल लयमा फर्काउन दलहरुलाई अपिल गरेका हुन्।
विगत केही समयदेखि सदनमा विपक्षी दलका सदस्यहरु सदनमा बोल्दै बहिष्कार गर्दै आएको अवस्थाका बाबजूद सदन सुचारू बनाउन सरकार र राजनीतिक दलहरूबीच हुनुपर्ने छलफल र संवाद नभएकोप्रति उनले चिन्ता व्यक्त गरे।
सभामुख घिमिरेले बैठक सुरू हुनासाथ असहमति प्रदर्शन गर्ने र बाहिरिने प्रवृत्ति संस्थागत लोकतान्त्रिक प्रणाली र संसदीय अभ्यासका दृष्टिले दीर्घकालीनरूपमा हानिकारक सावित हुनसक्ने भएकाले सबै सचेत रहनु आवश्यक रहेको उनले बताए।
उनले संसद केवल असहमति अभिव्यक्त गर्ने स्थलमात्र नभइ राष्ट्रिय सहमतिको आवाज प्रकट गर्ने थलो पनि भएको भन्दै यसका लागि सबैलाई गम्भीर हुन ध्यानाकर्षण गराए।
सभामुख घिमिरेले संघीय लोकतान्त्रिक गणतन्त्रलाई सुदृढ पार्ने प्रयोजनका लागि संघीयतासँग प्रत्यक्ष सम्बन्धित विधेयकहरूलाई पारित गर्ने प्रक्रियामा गम्भीर र रचनात्मक बहस अपरिहार्य रहेकाले बैठक बहिष्कार नगरि सहभागी हुन पनि विरोध गर्दैआएका विपक्षी दललाई पनि आग्रह गरे।
त्यसका बाबजूद आजको बैठक सुरु भएलगत्तै रास्वपा र राप्रपाका सदस्यहरुले भिजिट भिसा प्रकरणको विरोधलाई निरन्तरता दिँदै बहिष्कार गरे।
